اردو شاعری : تلخی زبان تک تھی وہ دل کا برا نہ تھا

تلخی زبان تک تھی وہ دل کا برا نہ تھا

مجھ سے جدا ہوا تھا مگر بے وفا نہ تھا​

​

طرفہ عذاب لائے گی اب اس کی بددعا

دروازہ جس پہ شہر کا کوئی کھلا نہ تھا​

​

شامل تو ہوگئے تھے سبھی اک جلوس میں

لیکن کوئی کسی کو بھی پہچانتا نہ تھا​

​

آگاہ تھا میں یوں تو حقیقت کے راز سے

اظہار حق کا دل کو مگر حوصلہ نہ تھا​

​

جو آشنا تھا مجھ سے بہت دور رہ گیا

جو ساتھ چل رہا تھا مرا آشنا نہ تھا​

​

سب چل رہے تھے یوں تو بڑے اعتماد سے

لیکن کسی کے پاؤں تلے راستہ نہ تھا​

​

ذروں میں آفتاب نمایا تھے جن دنوں

واصف وہ کیسا دور تھا وہ کیا زمانہ تھا​

SHARE THIS